Vetrarþjónusta

Vetrarþjónusta Reykjavíkur tryggir greiðar leiðir í snjó og hálku. Snjóvaktin vakir yfir borginni, metur aðstæður og bregst við þegar þörf krefur – jafnvel um miðjar nætur. Snjómokstur og hálkueyðing hefst oftast klukkan fjögur að morgni til þess að halda umferð gangandi.

Göngu- og hjólaleiðir

Göngu- og hjólastígar borgarinnar eru flokkaðir eftir þjónustustigi eins og sjá má á kortinu hér að neðan.

Þjónustuflokkur 1A (dökkblár) – stofnstígar fyrir hjólreiðar. Reynt er að tryggja greiðfærni kl. 7:30–17:00.

Þjónustuflokkur 1 (bleikur) – gönguleiðir að skólum og öðrum stofnunum. Reynt er að tryggja greiðfærni kl. 8:00–17:00.

Þjónustuflokkur 2 (grænn) – aðrir fjölfarnir stígar. Reynt er að tryggja greiðfærni kl. 12:00–17:00.

Þjónustuflokkur 3 (gulur) – minna notaðir stígar, aðeins hreinsaðir ef snjóhreinsun í öðrum þjónustuflokkum er lokið.

Þjónustuflokkur 4 (blár) – ekki reglubundin þjónusta heldur hreinsað eftir ábendingum íbúa. Ýmist er brugðist við hverju tilfelli fyrir sig eða stígur hækkaður um þjónustuflokk.

Þjónustuflokkur 5 (rauður) – hitaðir stígar sem haldið er greiðfærum allan sólarhringinn með hitakerfum.

Ruðningslengdir göngu- og hjólastíga

Heildarruðningslengd stíga í reglubundinni þjónustu í Reykjavík er 612 kílómetrar, sem svipar til vegalengdarinnar frá Reykjavík til Vopnafjarðar. Inni í þessari tölu eru ekki hitaðir stígar heldur aðeins stígar sem eru ruddir í reglubundinni þjónustu.

Lengsta ruðningslengd er í þjónustuflokki 1 þar sem ryðja þarf 239 kílómetra en stysta ruðningslengd er í þjónustuflokki 1A með 87 kílómetra.

Ruðningslengdir göngu- og hjólastíga eftir þjónustuflokki

Sveimaðu yfir grafið til að sjá nánari upplýsingar

Stígar í borginni eru flokkaðar í sex tegundir. Stígarnir með lengstu ruðningslengdina eru gangstéttir en ryðja þarf um 320,6 kílómetra af þeim. Stígarnir með stystu ruðningslengdina eru hitaveitustokkar, með einungis 0,7 kílómetra heildarruðningslengd.

Ruðningslengdir göngu- og hjólastíga eftir tegund

Sveimaðu yfir grafið til að sjá nánari upplýsingar

Götur

Gatnakerfi borgarinnar er einnig flokkað eftir þjónustuflokkum sem sjá má á kortinu hér að neðan.

Þjónustuflokkur 1 (blár) – helstu stofnbrautir, tengigötur vegna neyðarþjónustu, fjölfarnar safngötur og strætisvagnaleiðir. Í þessum flokki eru einnig þjóðvegir í þéttbýli sem Vegagerðin sér um að ryðja. Reynt er að tryggja greiðfærni kl. 4:00–22:00.

Þjónustuflokkur 2 (bleikur) – aðrar safngötur og götur að grunn- og leikskólum. Reynt er að tryggja greiðfærni kl. 4:00–22:00 og að hálkueyðingu sé lokið fyrir kl. 7:30 þegar það á við.

Þjónustuflokkur 3 (grænn) – húsagötur og fáfarnar götur sem eru aðeins hreinsaðar ef þær eru þungfærar, mikil hálka eða snjór yfir 10 cm. Reynt er að halda götunum akfærum frá kl. 7:00–19:00.

Þjónustuflokkur 4 (rauður) – götur sem hitaðar eru með affallsvatni og innspýtingu. Reynt er að halda þeim akfærum allan sólarhringinn með hitakerfum.

Auk umferðargatna sér vetrarþjónustan um að ryðja biðstöðvar strætó og bifreiðastæði fyrir stofnanir borgarinnar, svo sem leikskóla, grunnskóla og íbúðakjarna. Í heildina eru 258 svæði rudd sem eru samtals um 246.693 fermetrar!

Ruðningslengdir gatna

Heildarruðningslengd gatna í Reykjavík er 1.220 kílómetrar, sem er næstum því jafnlangt og allur hringvegurinn! Lengsta ruðningslengd er í þjónustuflokki 1 með 627 kílómetra en stysta í þjónustuflokki 2 eða 175 kílómetrar.

Ruðningslengdir gatna eftir þjónustuflokki

Sveimaðu yfir grafið til að sjá nánari upplýsingar

Saltkistur

Um götur borgarinnar fara stórvirk snjóruðningstæki sem komast hratt yfir og nota salt til hálkueyðingar. Á stíga og gangstéttir fara sérútbúnar dráttarvélar sem nota salt, saltpækil eða þveginn sand.

Hægt er að sækja salt og sand á opnunartíma Þjónustumiðstöðvar borgarlandsins við Stórhöfða en einnig eru 86 kistur með salti aðgengilegar fyrir íbúa um alla borg. Hér að neðan má sjá kort með staðsetningum saltkistna borgarinnar.

Kostnaður vetrarþjónustu

Vetrarþjónustan er nauðsynleg til að halda götum og stígum færum og öruggum en það er líka kostnaðarsamt verkefni. Á síðasta ári var kostnaður við vetrarþjónustu 1,3 milljarðar króna en 1,5 milljarðar króna árið þar á undan. Mismunur á raunkostnaði og áætluðum kostnaði var minnstur árið 2020 eða 128 milljónir króna.

Áætlaður kostnaður og raunkostnaður við vetrarþjónustu eftir árum

Sveimaðu yfir grafið til að sjá nánari upplýsingar

Ítarefni

Þessi gagnasaga byggir á gögnum úr Landupplýsingakerfi Reykjavíkur. Ef þú vilt vita meira um vetrarþjónustu bendum við á upplýsingasíðu Reykjavíkur um snjóhreinsun og hálkuvarnir.

Upplýsingasíða snjóhreinsunar

Aðrir málaflokkar