Hverfið mitt

Hverfið mitt hefur farið fram á hverju ári síðan 2012 en annað hvert ár síðan 2019. Kosningaþátttaka hefur aukist jafnt og þétt frá upphafi verkefnisins og náði hápunkti árið 2021 með 16.4% þátttöku. Í síðustu kosningum árið 2023 var þátttakan 12%.

Myndin hér að neðan sýnir kjörsókn eftir árum og kyni. Sjá má að konur hafa í gegnum árin verið í meirihluta kjósenda, fyrir utan árið 2021 þegar kvár voru í hlutfallslega miklum meirihluta.

Að meðaltali berast 877 hugmyndir í Hverfið mitt á hverju ári. Fjöldinn allur af háleitum hugmyndum hafa borist í gegnum árin en því miður hafa þær ekki allar verið framkvæmanlegar. Þar má nefna háskóla fyrir ketti sem dæmi. Fjöldi hugmynda sem berast hefur aukist jafnt og þétt frá byrjun verkefnisins og árið 2023 var hugmyndaríkasta ár þátttakenda fyrir Hverfið mitt.

Í síðustu kosningum árið 2023 var þátttaka minnst í Vesturbæ þar sem aðeins 8,6% kusu. Þyrstir og leikglaðir Vesturbæingar kusu sér meðal annars Vatnspóst við Ægisíðu og ný leiktæki í Vesturbæjarlaug. Mest var kosningaþátttakan í Grafarholti og Úlfarsárdal eða 17%. Þar þykir íbúum gott að njóta náttúrunnar, því nú er búið að reisa bekki við Reynisvatn og leggja göngustíg milli Úlfarsárdals og Hafravatns.

Þegar litið er til kynjahlutfalla þátttakenda eftir hverfum árið 2023 má sjá að konur voru í meirihluta kjósenda í öllum hverfum. Kosningaþátttaka var mest meðal kvenna á Kjalarnesi.

Þátttaka í Hverfinu mínu er nú opin öllum borgarbúum sem verða 15 ára á því ári sem kosið er í verkefninu. Flest þeirra sem kusu árið 2023 voru á aldrinum 36 - 45 ára en fæst á aldrinum 15 - 18 ára.

Myndin hér að neðan sýnir vinsælustu hugmyndina í hverju hverfi fyrir sig. Sú hugmynd sem hlaut mesta kosningu var GaGa völlur á Kjalarnesi og sú næstvinsælasta var Jólaland í Laugardal.

Alls voru 62 hugmyndir kosnar árið 2023. Flestar kosnar hugmyndir voru í Breiðholti eða 10. Fæstar voru kosnar á Kjalarnesi eða 2 hugmyndir.

Mikill meirihluti þeirra sem tóku þátt í könnuninni höfðu heyrt um Hverfið mitt. Flest sögðust hafa heyrt stundum, oft eða mjög oft um verkefnið en mun færri höfðu sjaldan eða aldrei heyrt um það.

Þegar íbúar voru spurðir um reynslu sína af verkefninu kom í ljós að 42,8% voru fremur eða mjög ánægðir, 17,3% mjög eða fremur óánægðir og 40% þar á milli.