Skólaþjónusta

Ráðgjafar skólaþjónustunnar starfa oftast í miðstöðvum borgarinnar og sumir hverjir hafa einnig fasta viðveru í leik- og grunnskólum. Árið 2024 var algengast að óskað hafi verið eftir aðstoð sálfræðings, en aðstoðar þeirra var óskað fyrir 855 börn.

Sum börn fá aðstoð frá einum ráðgjafa en önnur börn þurfa aðstoð frá tveimur eða fleiri ráðgjöfum. Á myndinni hér að neðan er því hver ráðgjafi sem óskað er eftir aðstoð frá skilgreindur sem eigið erindi. Sjá má að á tímabilinu 2014 til 2024 fjölgaði erindum um 47,8% á sama tíma og fjöldi barna í Reykjavík jókst einungis um 4,1%. Að hluta til má rekja aukninguna til þess að talmeinafræðingar komu inn í skólaþjónustuna árið 2018 en einnig til COVID-19 faraldursins.

Skólaþjónustan nær bæði til leik- og grunnskólabarna.

Árið 2024 voru lögð inn erindi til skólaþjónustunnar fyrir 10,5% barna í leikskóla og 7,2% barna í grunnskóla. Þessi hlutföll hafa aukist um 38,2% hjá leikskólabörnum og 52% hjá grunnskólabörnum síðan árið 2019. Í leikskólum voru drengir með 82% fleiri erindi en stúlkur en í grunnskólum var þessi munur 39%.

Það eru margar mismunandi ástæður sem liggja að baki hverri tilvísun til skólaþjónustunnar. Þegar tilvísun er send á miðstöð er meginástæða þess að aðstoðar sé óskað gefin upp og þær má sjá á myndunum hér að neðan. Árið 2024 var heildarfjöldi tilvísana hjá stúlkum 1.007 og heildarfjöldi tilvísana drengja var 1.562.

Hlutfall barna sem leitar til skólaþjónustunnar segir ekki alla söguna. Meirihluti barna nýtir sér þjónustuna einhvern tíma á skólagöngunni og hlutfallið fer hækkandi milli árganga. Þá fá börn þjónustu fyrr en áður. Sem dæmi var beiðni send fyrir 27,6% barna fæddra 2008 í 1. bekk, en fyrir 47,5% barna fæddra 2018.
Þessi þróun bendir til aukinnar þjónustuþarfar og þá sérstaklega hjá drengjum. Myndin sýnir þróunina á hlutfalli barna í 10. bekk sem hafa fengið þjónustu einhvern tíma á skólagöngunni.